Dili, Sabadu, 21/Agostu/2021-Ministru Petróleu no Minerais, Dr. Victor da Conceição Soares, hamutuk ho membrus VIII Governu Konstitusionál sira, partisipa iha Retiru Nasionál entre Sosiedade Sivil no VIII Governu Konstitusional ho Komunidade sira iha area Uaibitai, Aldeia Laumana, Suku Letemumu, Postu Administrativu Kelekai, Munisipiu Baucau, ne’ebé mak lokaliza iha Foho Matebean nia hun.Retiru Nasionál refere halao ho Tema : ” HAMUTUK ITA HAMETIN PARSEIRU KRITÍKU HODI DEFINI PROGRESU BA DEZENVOLVIMENTU NASIONÁL “.
Durante retiru ne’e, Sua Exélensia Primeiru Ministru Taur Matan Ruak, halao dialogu ho sosiedade sivil no komunidade sira iha aréa Uaibitai.Retiru Governu ho Sosiedade Sivíl.
Sua Exelénsia Primeiru-Ministru Taur Matan Ruak, prezide retiru entre Governu ho organizasaun sosiedade sivíl sira, ho tema “ Hamutuk Ita Hametin Parseiru Krítiku Hodi Define Progresu Ba Dezenvolvimentu Nasionál”, ne’ebé mak organiza hosi Forum ONG Timor-Leste ka FONGTIL, sábadu semana kotuk ne’e iha Waibitai (foho matebian feto-mane nia klaran] Postu Administrativu Kelikai, Munisípiu Baukau.
Objetivu hosi retiru ne’e, nu’udar forum entre Governu ho sosiedade sivíl sira, bele hasoru malu direta, hodi troka ideia no hanoin kona-ba polítika Governu nian, aleinde sosiedade sivíl sira mós aproveita hato’o direta sira-nia rekomendasaun no advokasia sira ba Governu, ne’ebé durante ne’e hato’o de’it liu hosi media, hodi Governu bele konsidera ba iha planu asaun Governu nian.Primeiru-Ministru Taur Matan Ruak iha nia intervensaun, sente kontente ho retiru refere, hodi agradese ba ONG Forum ba realizasaun retiru ne’e, no konsidera ne’e importante ba governasaun ida ne’e hodi rona mós hosi parte Sosiedade Sivíl sira-nia hanoin no krítiku sira ba bem komún sidadaun sira-nian, tanba Sosiedade Sivíl nia papel mos importante iha País direitu demokrátiku hodi evita arbitrariedade no prepoténsia abuzu poder.
Ha’u konsidera Sosiedade Sivíl hanesan parseiru ida importante ba estadu direitu demokrátiku. Sosiedade Sivíl sira-nia papel síviku ne’e importante loos, tanba saida? Ne’e Evita arbitrariedade, evita prepoténsia abuzu de poder. Nasaun sira ne’ebé kuandu sosiedade fraku ne’e Governu no Estadu ne’e prepotente, abuzu nia poder entaun ita presiza sosiedade ida ké kritiku, mais iha kritériu balun ké ida mak tenke kontribui ba bem komún. I papel Sosiedade Sivíl nia di’ak mak ida ne’e, kontribui ba bem komún, defende sira ne’ebé labele ko’alia, tanba Governu labele marka iha fatin hotu-hotu no haree buat hotu-hotu
Dehan Xefe do Governu iha nia intervensaun
Iha retiru ne’e, Xefe Governu mós fahe ideia jerál kona-ba vizaun Estadu nian, prioridade ka foku sira ne’ebé Governu ne’e iha, inklui dezafiu sira ne’ebé Governu ne’e hasoru.
Xefe Governu mós agradese ba ONG forum ne’ebé hili área Waibitai-Mateian ba fatin retiru nian, tanba fatin refere iha valor istóriku iha luta ba libertasaun nasionál hanesan baze apoiu ne’ebé rahun ikus liu, no fatin ne’e iha poténsia ba turizmu istóriku no paisajístiku.
entretantu Iha retiru ne’e fahe mós sertifikadu ba Organizasaun Sosiedade Sivíl sira ne’ebé susesu halo advokasia ba área sira ne’ebé sira jere, aleinde ne’e hala’o mós diálogu ho komunidade hosi Postu Baguia no Kelikai hodi rona sira nia difikuldades no membru Governu sira reponde direta ba preokupasaun hirak refere.
Hola parte iha retiru ne’e, Vise Prezidente Parlamentu Nasionál, Maria Angelina Lopes Sarmento ho deputadu balun, Ministru Finansas, Rui Gomes, Ministru Administrasaun Estatal, Miguel Pereira de Carvalho, Ministru Edukasaun Juventude no Desportu, Armindo Maia, Ministru Petróleu no Rekursu Mineral, Victor da Conceição Soares , Ministru Turizmu Komérsiu no Industria, Jose Lucas do Cramo da Silva, Vise Ministru Agrikultura no Peska no Sekretáriu Estadu Arte no Kultura, Korpu Diplomátiku balun, Prezidente Autoridade Munisípiu Baukau, lider komunitária sira no komunidade sira hosi Postu Kelikai no Baguia inklui, entidade sira seluk.
Programa retiru ne’e, hetan apoiu hosi Gabinete Apoiu Sosiedade Sivíl, Gabinete Primeiru-Ministru nian.
